Ğǝvistonədə mǝllo ğəvi səpe divo handedǝ, rǝyoni yolə məmur bə ğəvi diyə karde-karde fik kardedə : «Çəmə oxone vırən im tibə bəbe. Çandi çan sor pul qırdə bıkəm, ğızıl qırdə bıkəm, çanədə kə-villa, saray bıdutom, peşo hiç insofe azən bımardom, mıniən bə zəmin dakadən? Vay-vay ım çı mısibəte. Dinyo lap hədǝrǝ şeybǝn. Çan sore az rışvə səydəm, rşvə doydəm, zəmin həvatedǝm, xəlği xuni pesomedom, vay-vay.De hektaron zəminım bebe 2 metrə zəmin bəmı bırəsi..
Roste, iştə sə rışvon həmma boşta peqǝtemni, bǝpean doəme. Xəlğ həni bəmə nıfin kardedə, xǝlğ bəmə tu kardedə. Məsǝme dǝvardə sori çı qıləy məmuri ğəvi sape nəcis kardəşonbe. Əlbəttə bəkan, camaat hani pust bedǝ. Neye, ne, hǝni vase, tobǝ bakardem, həni rişvə əstənim, həni bə xəlği du avotnim. Hani rosta sıxan votǝkǝson ədənim qǝte. Tobə bəkardem. Həni vəse çı əlilon, çı zəlilon, çı yətimon həxi hardıme. Maştənəku tobə bəkardem. Həni bo xəlği xəyə ko bakardem. Çiç kardedəm ənədə kə-villa? Ənədə maşinon deştə bə ğǝb əbənimki… Çımı bankǝdə bə pulon Xıdo bəzne bəki ğismət bəbe. I qılə zoǝm heste, ǝvǝn Amerikadə, əvən zay be, şe. Çǝyo bomı çı fərzənd bebǝşe? Jenan çi biznom kom zəminonədə nəvədə. Neye, ne, sə be, həni bə həxə ro obaqardem. Tobə bəkardem.»
Məlo divo hande sa kardişe, məmur ğəvistono oqardeǝdǝ,ıştə Cib maşinədə bə xiyal şəbe: «Bəşem çı naziri tono, bǝvotem ki, mıni çı koyku bekǝ. Bebǝka? Tarsedǝm benikəy. Isət çətinə devre, hiç kəsi de xoşi çı koo bekardənin. Ne, mıni hejo koo bekardişone dǝbǝnon bə dılə. Ə ruji di kəs kana nazir dənoǝbe bə dılə. Vay dədə, bəs çımı ənədə ğohum-əğrǝbon çıko bǝben? Çənədə ko kardedəş, həmməkəs bəti hurmət kardedə, hejo çı koyku beşiş, səbe, odəmi bə sipǝ vırǝn noydənin. Hiç jenən mini bə yod dənənin. Bəs çiko bıbu? Tobə bıkəm? Mǝkǝm? Əşi, çiç bəəə? Tobə karde vitdəni ki. Mǝlon votedǝn tobǝ kaybǝ hıjo oje. Əvon votedǝn lap mardeǝdǝn tobə bıkoş, ğəbul bǝbe. Bəs xǝlğ çiç bavote? Azən beko mandǝme. Xəlğ, xəlğ.., xǝlğ bənǝy pəsi qıləy hayvone. Vindəməni, çəvon ruşnə puli rost kardedən, dama bedənin, ğazə puli rost kardedən, dama bedənin, ərzaği rost kardedən, dama bedənin. Bı xəlği jiqo lozime. I kəsə votǝşbe: «bə xəlği çok diyə bıkoş, batı kəllə bəjen». Rost votəşe, ǝğılə pul doydənin — çok kardedən. Dımi bıbu hiç pensiyǝon bǝpe mədəmon. Guldorə devrədə pensiyə bə? Ne, bǝni! Yolon rost votǝşone: «bo xəlği bəməkəs beçəş bǝmande». Isətnə devrədə bo xəlği bəməkəs turmədə bəmarde. Çoki ime çokna jidəm, jaqoon bijim. Mardeǝdə təbə bəkardem. Ya ğismət…
