Bu qızı ilk dəfə görürəm axı,
Nə üçün doğmadır bu qədər mənə?
Bəlkə də, özümdən xəbərsiz bir vaxt
Yol tapa bilmişəm onun qəlbinə.
Təkcə saçlarının qoxusu ilə
Bütün qoxuları poza biləsən.
Kaş əlində ola, elə bu anda
Özünü alnına yaza biləsən.
Adamı şair də sevər, unudar,
Bu qız taleyindən gərək qorxmasın.
Ömrümü söykədim baxışlarına,
İlahi, tapşır qoy yana baxmasın.
Ona bəndə kimi baxımmı indi?
O da mı Tanrıdı, yeri, göyü var?
Sevməyə məcburam onu, neyləyim,
Onun tovuz kimi gözəlliyi var.
