(Bə əhvolot)
Zomsonə manq be, zəminədə xəyli voə hısbe. Xanəli aləfə tayə tono voəş qırdokəno kardəşbe, aləfə tayə jiədə emə aləfi donəqıləş peşandəbə zəminisə. Bə kuməkijon təyştiku tələş noəbe, kuməkijə qətdəbe. Xəyllş qətəbe, ponzə — visqlə əbiy. Vardışe doşe bə inə, votışe:
— İnə dyəkə çanədə kuməkijəm qətə. Bıpat bahamon.
İnə bə çoştəy ro məjuə ğəyləş noəbe. Ve fikış karde, oxoni qıləy ro pəydoş karde. Kuməkijon por dı pusı ivrədə odırnışe. Çəvon ləvə-ruəş təmizış karde, şodoşe bə məjuə ğəylə dılə. Məjuə ğəylə peqarde be məjuə-kuməkijə ğəylə.
Çoştə harde vaxt oməy. Əğılon nışdin sufrə kəno. Çı kəy yolə merd Əli dədə oməy nışde çı süfrə sədə. İnə bo əğılon məjuə ğəyləş ekarde. Bə Əli dədən i piolə ğəyləş ekarde, vaşe noşə çəy vədə. Əli dədə keçəş dənoy bə ğəylə vindışe çiçsə hıse məju dılədə. Fikış kay ki, ğəylə dılədə jeğo şeyon bənin ni. Iştə sədoş nibekarde. Əşte şe nışde çı televizori vədə. Dəstə inə voteşe:
— Merd bıçı patpeş hardəniş?
— Az peşo baham, – votışe Əli.
Əğlon çoştə patpeşişon harde, çı inəku ve rozi mandin.
İnə oxoni oməy çı merdi tono, xəbəş şəy:
— Əli, tı boçi ıştə patpeş nıharde, sardon bıə. Tat bıkəm bınışt bəhə ışdə patpeşi.
— Tı ıştə sədo beməkə. Bıdə əğolon nıməson.
— Çiç bıə ki?
— Ozzo bıə, dard bıə, çımı patpeşdə morə hıse!
— Merd, ışdı patpeşdə morə çiç kardə.
— Bəşt bışi ıştən diyəkə.
Jen şe çamçəş dənoy bə ğəylə, rosış karde, sırəy.
— Bə jeni diyəkə haa… Hələ ın jen sıredə. Bıçı sıredəş?
— Zə, ğəylədə bə kuməkijə kəynə morə bıə? – votışe Dəstə. Xanəli kuməkijəş qətəbe, azən əvonom ğəylədə patəme.
— Tı bəmı bıçi patpeşi ekardədə nıvote çəy dilədə kuməkijə hıse? Mı zındənıbim çı Toloşi jenon fantaziyə ənədə nığıle.
Nışde Əli dədə dı ləzzəti məjuə-kuməkijə ğəyləş harde. Peşo əvon xeyzon umjənə xəyli bı əhvoloti sırəyn.
